US ram Indianapolis ih um Falam Christian Church of Indianapolis (FCCI) ah Senior Pastor a tuan rero lai tu Rev. Dr. Hre Mang cu US ih um Laimi pawl ih nuntu khuasak daan thawn pehpar aw in thuhla hrekkhat cu Shekhem Mekazin in thusuhnak a nei.
Shekhem: Kawlram na suahsan hnu na umnak ram pawl, tufang khui ah na um ti le fimzirnak degree na lak mi pawl in sim thei pei maw?
HM: 1988 Kawlram buai hnu ah Kachin ramah feh in khua le ram ka suahsan hnu ah 1991 ah Kachin ram ihsin India ram ah kan tlung ih, Bangladesh ah rei lo te ka um.
1993 ihsin 1999 tiang Bible tlawng ka kai Cule 2000 ah US Congress ih tuahmi scholarship program ka ngah ve ih US ka feh.
US ka thlen hnu ah New York state ah kum 2 sung (2000-2002) tlawngkai in ka um ih 2002 ihsin Indianapolis, Indiana ah ka insang thawn kan um.
Zirnaklam thu ah Kawlram, Mandalay University ah Bachelor of Physics ka rak zir ih rambuai ruangah degree ngah loin ka tanta.
India ram, Delhi University ah Bachelor of Commerce (correspondence) ka rak zir ih course cu ka \heh zo nan degreee ngah loin ka rak tanta, Aizawl Law College ah kumkhat ka kai nan degree ngah ta loin ka tlansan fawn.
Pathian bawmnak in degree ka ngahmi pawl cu B.Th. Theology (Grace Bible College, India); Th.M. Theology (Cohen Theological Seminary, India); B.A. Political Science (Hartwick College, New York, USA); M.P.A. Master of Public Affairs (Indiana University, Indiana, USA); le Ph.D. in Leadership (Tennessee Temple University, USA) pawl tla an si.
Shekhem: Na innsungsang thu mallai theih kan duh.
HM: 1998 ah LCF, Aizawl, Mizoram ah thitumnak thiang in ka nupi Lynda Tumpar thawn kan nei aw. Ka nupi, Lynda Tumpar cu India ramah B.E. Civil Engineer, M.E. Civil Engineer degree a ngah.
Mizoram PWD zung, India ah kum 7 Sub-division Officer hna a rak \uan.
Fapa pahnih kan nei ih Ginny Zalan Mang (kum 16), le Moses Cung Hlei Mang (kum 14) kan nei. Indianapolis, Indiana, USA ah kan um.
Shekhem: Tufang ih na hna\uanbikmi le tuanvo dangdang na kaihmi pawl in sim aw?
HM: Atufang hi Falam Christian Church of Indianapolis (FCCI) ah senior pastor ka \uan.
|uanvo dang tete, pawlkom sungah ka telnak pawl tla cu Director of Development Department, Chin Baptist Association of North America (CBANA), member of Board of Directors, Chin Community of Indiana, Board of Directors and member of Burmese American Community Institute (BACI) pawl tla an si. Advisor dinhmun in pawlkom ah ka telnak pawl tla cu Institute of Chin Affairs (ICA), International Life Ministry (I-Life Ministry) pawl tla an si.
Shekhem: US ah hin Laimi, cun Falam mi mipum ziangzat lai kan um zo? US thleng Laimi tambik ih kan hna\uanmi hi ziangvek lam a si?
HM: 2014 ah BACI ih hliakhlaimi report vek asile US ram sungah Chin mi 45,000 lenglo kan um zo. Falam milesa hi a cekei sim ding ka thei lo, 5,000 leng lam kan um cu zum a um.
US theng Laimi pawl hna\uan tambik cu blue collar job kan ti dingih factory, warehouse hna\uan pawl a sibik. Motor tuahnak, sa thahnak, thilri tuahnak le thilri retkhawmnak,… tvp a si bik.
Cui hlei ah mahte business tuah thei mi malte an um rero thlang. Sushi (Japanese rawl) dawr tuah in hna\uantu tla an um vivo. Rawldawr, grocery dawr lam, dawr tuah mal tete an um vivo.
Cozah le business zung hna\uan tla, ca zir sang pawl tla an um vivo thlang. Cun mirang \ong thiam deuh pawl in \ong lettu hna\uan le social service agency pawlah hna\uantu tla mawi tawk zet an um. Miburpi cu factory le warehouse pawl ah an \uan tambik.
Shekhem: US a thleng pektu, a silole, kum khat ihsin kum hnih hrawng a um zotu Laimi pawl hrangah ziangmi pawl hi thil harsa, a silole, sawmngiarnak (challenges) pawl an si tin na ruat? Ziang ruangah a si pei? Thuhla pathum hrawng in in sim aw.
HM: Laimi US thlengpek pawl hrangah harsatnakbik pawl cu ei in hawlnak, \ong, le nunphung thar sungah nuntu khawsak hi a si bik in a lang.
Ei hawlnak hi an harsa ti ding tlak in ei in nei lo, hna\uan nei lo cu an um lo tluk asinan hna an \uan tikah hna\uan dan a danglam ih zir cop rero an si ih harsatnak ziangmaw cin a um. Ke thawn feh sukso a theih lo ih Lailam lo thlo hna\uan an \uan nawn lo tikah \uan dah lo mi hna\uan, kut hna\uan pawl cu thiam cawp zir cop an si ih ziangmaw cin harsatnak a um.
Laimi tamsawn cu mirang \ong thiam lo kan si tikah hna\uannak, nuntu khawsaknak ah \ong kan thiam lo ruangah harsatnak ziangmaw cin a um. Siatnak khawp in harsatnak asilo nan um nuam lo khawp in harsatnak tete cu a um. Nitin postbox sungih ca siar thiam lo, harhdamnak, ei hawlnak thu \ong thiam lo, ca siar thiam lo an sinak in harsatnak ruangah ziangmaw cin an tong.
Nuntu khawsak, nunphung lam ah harsatnak ziangmaw cin a um fawn. Inn hnen kiangkap ah miphun dang thawn pehtlaihnak, fanau enkawldaan, cozah le zunglam pehtlaihnak, hna\uannak ah umtu tlanlendaan, nitin nuntu khawsakdaan thawn a pehtlaih ringring mi thu ah harsatnak ziangmaw cin a um.
Harsatnak an tonmi lakah hrial theihmi a umih hrial theih loin mithar sinak ruangah hmuhton mi a um fawn. Hrial theihmi pawl hi bawmtu \ha neih lo ruangah siseh mah in zir le hawl duh lo, tumlo ruangah harsatnak an ton mi a um. Hrial theihmi pawl cu zir duhnak le thleng awk duhnak, \hansoh duhnak thawn zir hai sehla tampi harsatnak an hrial thei mi tla a um ko.
Shekhem: US a thleng pektu, a silole, kum khat ihsin kum hnih hrawng a um zotu Laimi pawl hrangah ziangmi pawl hi nuam an timi a si pei? Thuhla pathum hrawng in in sim aw.
HM: Ei le in, umnak inn le fehsuksonak, zalennak pawl tla nuam an ti cio mi a si ding ti ka zum.
Ziang hmeh nan ei? Tiah sut awk tikah, “Arsa, voksa tuktak a si ko” ti thei ding khawp in sa duhduh, hanghnah hangrah, ci ni thlum le caw hnawi, khuaitizu, thingtheirah duhduh khawpkham zetin an ei thei.
Umnak inn hi a sa a dai tuar tul loin air condition le heater ret \heh a si.
Feh sukso nak ah ke in vak sukso um loin motor lawnglawng hman a si. Nauta upa ti um loin, farah nauta ti um lo in zo cio tla motor thawn vak sukso asi tikah Lairam ah cawleng hman to dah lo pawl tla motor hlir kan to \heu tikah nun awlsam, nuam ti ding cu asi ko.
Cun zalennak hi a nuambik pakhat a si. Farah zawnzaihnak ihsin zalennak siseh, cozah uk bet awknak ihsin zalennak pawl, society ah hrekkhawng awknak um loin zalennak pawl hi nuam ti ding pakhat cu a si ve.
Sumpai harsatnak ruangah ei le in dang duh ei thei lo an um lo, umnak inn nei loin lamzin parah a it mi siseh khawsik khawsa tuar an um fawn lo. Mai innsang ciar ah lastest model flat smart tv, computer, internet, cellphone, …tvp, santhar fimthiamnak hmanrua pawl an hmang thei ciar.
Society ah farah nauta nautat awknak a um lo. Cozah \ih ah thin nuam loin um a \ul fawn lo. Mai thuthute sawh tiah zalennak an neih cio mi hi mi zocio khalin an ruat lo tla asile nuam an timi a si cio ko ding.
Shekhem: US thleng Laimi pawl ih biaknak lam kan dinhmun (kan thlarau mi sinak) teh ziang a bang? Kawlram kan um lai thawn tah\him tikah ziangvek thansonak asilole \umsuknak pawl kan nei? Nangmai si ter na duh daan tla in sim aw.
HM: May 2015 ah kanmah kawhhran (FCCI) in CBANA BM meeting khual kan dar ih mikhual 200 lai an suak khawm, khawsung mi thawn 300 zikte lai kan si.
Kawlram ah milian, sumdawng zu thawthaw sa thawthaw rak ei in a nung khawsa thei mi, milian mi\ha, Kawlramah biaknak lamah ngaihsak tuk lo, ngaihsak man tuk lo pawl tla USA ahcun kawhhran upa, hruaitu an tuan \heh hmuh tikah mangbangza Pathian zangfahnak, thlarau malsawm kan dawng asi tiah ka ruat.
Culawng asilo, US thlen hnu ah pacang nupi fanau nei cingin kuakfawp zu in buai hmuh ding le rel ding an um lo tluk a si. Kan mino pawl khal Pathian an duh ih biak inn tinah nauhak tete Sunday school ah Bible an zir, Pathian Thlarau in mangbangza in lam in hruai a si.
Kawlram sung thawn tah\him asile ramleng kan milesa pawl hnenah Pathian Thlarau a phuang suak aw sinsin in a lang. Lungawi in Pathian ka thang\hat.
First generation, US theng pek pawl cu Pathian an tlansan nawn lo ding tiah ka zum. Ka hna a ngam zet.
Siter ka duhmi le hmalak \ul zetih ka ruahmi cu kan mino pawl hrang a si. Nulepa kum 30 tlun lam cu Pathian thu khal mawi tawk tak an thei ciar ih leitlun lamah an hlosal ding khal ka zum lo. Asinan mino, thangthar pawl hi nasa ten nulepa, hruaitu le pastor pawl in hma kan lakpi a \ul. Mino pawl cu leitlun ah tisa nawmnak ah an hloh a ol, hloh nak ding leitlun nawmnak a tam tuk.
Dr. Kim in a sim vek asile US ah mino phunhra ong pawl lakah 70% lole 80% tluk cu phunhra an \heh hnu ah an nulepa biakinn an thleng nawn lo, an biaknak an tlansan ti a si. Laimi kawhhran pawlin kan hmanmi biakinn sung le kawhhran ah program pawl hi a tam sawn cu nulepa, kum upa duhzawng ei thei zawng lawnglawng a si deuh.
Curuangah Kawlram sung ah missionary thlah cu thupi zetah kan ruat rualrual in kan umnak khua, kawhhran, community ciar ah kan fale, mino, thangthar pawl hrangah lamzin thar kan on sak ih nasa ten canpual tha sangka on sak in sumpai an \ulmi siseh hmanrua an \ulmi pe in kan bawm, kan tundin, kan sawmdawl ding hi thansohnak hrangah thupi zet in kan ruat, ih ke kan kar a \ul zet tiah ka ruat.
Shekhem: US thleng Laimi pawl in kan biaknak thu ah siseh, kan calai le kan nunphung thu ah siseh ziangvek hmalaknak an nei? Ziangvek pawlkom pawl a um ih ziangvek cangvaihnak pawl tuah rero a si? Nangmah na duhsak daan tla in sim aw.
HM: US a thlengmi Laimi pawl hi zapi huap pawlkom awknak pawlkom hnget khoh a um lo. Peng ciar in \hen aw in biaknak, social lam khalah pawlkom din ciar a si.
Zomi, Hakha (Thlantlang telin), Falam, Matu, …tvp in mah le peng\hen sung milesa ciar hrang pawlkom neih a si.
Falam lam in biaknak lamah Chin Baptist Association, Gospel Baptist Church Association, Chin Christian Fellowship, le Presbyterian pawlkom, …tvp in a tlangpi thu in pawlkom pali (4) a um. CBANA hi a tumbik a si ih local church 30 lenglo an tel, mipum 2000 lenglo an um. Hakha lam ah Chin Baptist Convention hi a tumbik pawlkom a si ih local church 90 lenglo an tel ih mipum 26,000 lenglo an um. Matu pawlin Matu Christian Fellowship, Zomi pawl in Zomi Baptist Association, …tvp an nei ciar. Mah le local church lenglamah association an din vivo ih cangvaihnak tete an nei.
Association ciar in local church ziangtin kan bawm ding, ramsung mission, khawmpi, ..tvp tuan tlang in \hansohnak an hawl ciar. A \ha zet.
US kan thlen tikah American ram thawn a kaih aw mi pawlkom pehtlaih awknak le santhar mino pawl lamzin thar ah hruai thei dingin thleng awk \ulmi tam zet a um. Pastor le hruaitu tam sawn cu Kawlram sung ihsin a thanglianmi, a zirmi, hmuhtonnak nei mi an si tikah ramleng, santhar nunphung thawn a kaih aw mi kaihhruainak, pawlkom pehtlaih awknak thawn kaih aw in leitlun tlan zuam awknak ah santhar mino kaihhruainak thei dingin zir, nunpi le \hansoh kan \ul zet.
Kan Lairam ihsin thleidan awknak, mirang \ong in kan sim asile social evils, political evils, tradition/cultural evils le religious evils pawl in ramleng hruaitu le mipi lungthin thuk zetin hmun a luah in a ciahneh mi pawl doneh in thathnemnak um lo lawng si loin dunglam ah hnukdir tu nunphungsia lenglam ah lan thei dingin hmasawnnak kan \ul zet.
Shekhem: US thleng Laimi pawl le pawlkom pawl hin hmun khat te ah Laimi sinak hlawm aw in hna\uan thei daan a um maw? Laimi pawl kan lung a rual theinak dingah ziangvek pawl tuah a \ul ih, ziangvek pawl hrial a \ul tin na ruat?
HM: Laimi zapi te pawlkom awknak cu lamzin sangka a ong aw mi kan thun thei hrih lo a si bik. Khrihfa pawlkom lamah Chin mi zapi huap in pawlkom din suak dingin Rev. Dr. Hre Kio te hohatnakin Global Christian Fellowship din dingin an rak zuam nasa nan an hlawh tling lo.
Miphun lam pawlkom ah zapi huap a um lo. Community pawlkom lamah khaw hrekkhat ahcun zapi huap kan nei nan a cak tuk lo. Tah\himnakah Indianapolis ahcun Chin mi 15000 tluk huap mi Chin Community ah Chin mi zapi huap in pawlkom din a si. A hlawhtling bik kan ti mi asinan hna\uan thei mi cu mipi zapi tungding hruai khawmtu lam silo in khawsung \ulmi community milesa tuamhlawmnak fangfang a si.
Social lam khalah Hakha lam unau pawl in Chin Youth Association (CYO) hi Hakha le Thlantlang huap in an neihmi a si (midang tel theih lo tinak cu a si in ka thei lo), Falam lam in Chin Community of USA, Tedim lam in Zomi Innkuan, Mizo \ong hmang pawlin Mizo Association of America, cun Matu pawlin cuvek thotho in Matu social pawlkom an nei.
Zianglam khal asile zapi huap pawlkom kan nei theilo tla asile kan tlintawk, mah le peng milesa ciar tal miphun dang lakah hloral ta lo dingin fingkhawi awk a si tikah thil\ha a si tiah ka ruat. Cutin mah le peng, ram\hen sung milesa pehtlaih pawlkom awknak cakzet kan neih thei asile lehhnu ah Chin mi zapi huap pehtlaih awknak, pawlkom awknak tla a um thei leh ding a si tihi ruahsannak a um.
A thupi zetmi cu mah le peng ram\hen milesa pawlkom hngetzet le cakzet in kan din thei ih mah le peng ram\hen milesa pawl kan fingkhawi awk thei ding hi atu ih dinhmunah kan tlin tawk a si hrih in a lang.
Hrial \ulzetmi cu a tlun ah sim zo mi social, political evils, religious evils pawl in kan mibur thazaang (social force, social capital) a ei siat lo ding a thupizet. Mah le peng, ram\hen milesa lak ihsin mifim mithiam, zirsang, fimnak a neitu pawl kan cawisang, an dung kan thlun ih an fimnak pawl kan miphun hrangah hmang thiam dingin canpual \ha kan pek, sangka kan on ih kan thlun thiam asile leitlun miphun dang lakah Pathian in mualpho in in ret lo dingih \hansohnak lam ah cakzet in kan tlan thei ding a si.
Cutin a tuah thiamtu, a tuahtu, mifim mithiam, Pathian in vanlam fimnak thawn a thuammi hruaitu \ha pawl dung kan thlun, an ruahnak kan pom thiam ih canpual \ha le bungrua pawl kan pek thei, a hmang thiam tutu an \hangso ding.
Cutin siloin hrinhnam, pawlkom, thlei dan awknak in huat awknak, thleidan awknak, iksik awknak, lungrual lonak pawl thawn atnak in kan mipi pawl kan hruai asile miphun dang lakah kan pil hlo sinsin ding a si.
Shekhem: US thleng Laimi sungah fimzirnak a neitu mipum hi kan tam maw kan mal, college le university kai tu pawl teh ziangvek subject lam si an zir tlangpi bik? Laimi pawl ih an fimzirnak thu ah nangmai na hmuh daan le na duhsak daan pawl in sim maw.
HM: Upa pitling cia in US a thlengmi pawl phunsang tlawngkai cu an tamtuk lo. Asinan nauhak lai in a thlengtu, phunhra hnuailam mino pawl cu fimzirnak lamah an tlancak zet a si. College, university, phunsang tlawngkai an tam vivo zo. Tah\himnakah, Indianapolis khua lawngah Chin tlawngta (High school hnuailam) 2,500 lenglo kan nei ih 2014 ah phunhra ong 100 lenglo kan nei. US pumah college kai hi a thawngtel asilo hmanah zatel tamzet an um zo ding.
An zir tam zetmi hi medical, nurse, engineer, science lam an zir tam zet. Kawlram sung vekin nule pa in fale pawl hi silam thiam nak le pakhatkhat nawr hrim ding asilo. Ziangvek khal anmah nauhak pawlin an duhmi, phurzawng an zir hi hlawhtlinnak hrangah a thupi zet.
Social science lam zir tla kan \ulzet, law, administration, politics, business, finance, …tivek pawl tla mi tampi thiamsang kan neih a \ul zet.
US ah phunsang tlawngkai dingin nulepa in sumpai bawm thei lo tla le scholarship le student loan thawn siseh hna\uan phah in siseh phunsang tlawng kai theih a si. Kan Laimi pawl dinhmun cawisang dingin fim zirnak hi a thupibik pakhat as i nasa ten kan forhfial awk, bawmbawi awk le sawmdawl awk a thupi zet.
Next generation, kan tesinfa pawl cu warehouse le factory ah blue collar job, hna\uan niambik pawl a \uanmi miphun kan si lo nak ding hrangah zirnak tha kan pek awk a \ul nasa. Nulepa, first generation pawl cu fim zirnak lamah thu a phunphun ruangah an pehzawm thei nawn lo nan kan fale sanah miphun hnufial, miphun dang dungah a tangmi kan silonak ding hrangah phunsang tlawngkai fim zirnak lam tha kan pek ih kan bawm bawi awk a thupi zet a si.
Shekhem: US ah professional (white collar) dinhmun le acozah hna\uantu (civil servant) dinhmun in hna a \uan rerotu Laimi kan um/kan tam maw? Kan um a si le ziangvek lam bik ah an \uan tambik? Professional dinhmun ih a \uan kan tam thei vivonak dingah ziangvek pawl tuah a \ul ih ziangmi pawl hi dawnkhamtu an si ti in sim aw.
HM: Professional career, doctor, engineer, le thiamsang filawr ti ding mi malte lawng an si ding. 2000 hlan ah US a thleng hmaisa tu kan Chin mi pawl hi professional hna\uan \ha, zung hna\uan \ha a kaitu an um hnuai hni nan Chin mi pawl thawn a pehtlai aw tuk nawn lo tla an um hnuai hni.
Zung hna\uan fangfang, social service agency ah hna\uan siseh, healh care center, cozah agency ah hna\uan, insurance company, …tvp ah hna\uan cu an um phahphah. First generation pawl lakah cuvek in zung hna\uan thei cu mi malte sawn an si.
Hmailam ah professional hna\uan sang kai thei dingin fim zirnak lamah nasa ten kan zuam a \ul. Kan fale santhar mino, US ah phunhrek ihsin a zirtu pawl cu phan ding a um lo, professional hna\uan \ha\ha an \uan ding a si tiah simcia theih tluk a si. Ca zir, fim zirnak lamah a thiambik lam, laksawng ngah thei khawp in Pathian in kan fale pawl cawisang in lamzin a hruai rero timi hmuh ding tampi kan nei.
Tuihnu kum 10, 20 ahcun professional level hna\uantheitu Chin mi tampi US ah kan nei ding tiah ruahsannak a um.
Dawnkhamtu tihnung khawp in harsatnak a um lo tluk a si tiah sim theih a si. Sumpai harsatnak hi dawnkhamtu bik cu a si ding nan US ahcun phunsang tlawngkai dingin a duh taktak le tum taktaktu cun scholarship le student loan thawn zir theih a si.
Nulepa pawl khawruahnak khal fale fimthiamnak lam ahcun thinlung sangka ong in thazaang an pek zet cio ko. High School zir \hehpawl hi mahte innsang din in ei in hawl thei fangfang lungawi tawk loin phunsang degree sang zir in hna\uan sang an kaih thei nak ding hrangah kan Laimi lungput tumtah sang nei thei dingin forhfial awk le zirh awk, khih hmuhawk tla a \ul zet.
Cumi ruangah keimah tla innsang nei le harsatnak tampi lakah Ph.D. tiang kum upa hnu ah mino pawl zoh\him dingah ka zir reronak asi.
Innsang hrekkhat cu sumpai harsatnak ruangah High School zir \heh ihsin hna\uantu pawl hi an thansoh ding zat \hangso thei lo dingin dawn khamtu pakhat cu a si. A thupi zetmi cu nulepa siseh mino pawlin siseh US ah a thleng cia mifim upa pawl hnen ihsin thurawn, ruahnak \ha la thiam in thansohnak lam an pan thiam asile tampi mi pitling an suak phah ding.
Shekhem: US ih a umtu Laimi pawl hin Kawlram ih a ummi Laimi le Lairam \hansonak hrangah ziangvek tuah theimi le tuah ding mi pawl kan nei tin na ruat?
HM: A tufang ah US thlengmi Laimi pawl in ramsung hrangah an tuah ciar mi cu bulpak dinhmun in mah le sungkhat hrang sumpai kuat a si. Mah le khua le ram hrangah sumpai khon khawm in sumpai kuat a si fawn. Cun tah\himnakah CNF bawmtu pawlin Chinland Club an dinih ram hrang hna\uantu pawl hrang sumpai kumtin dollar tingtel an bawm thei mi tla zoh\himtlak zet a si.
Cun biaknak lamah ramsungah missionary thlah in siseh mah le pawlkom pehtlaih mi ciar ah sumpai bawmbawi awknak pawl tla thil\ha zet a si. Atu-ah kan tuah rero zomi pawl cu pehzawm vivo dingah ruat sehla, a thupi zetmi cu ramleng ah zirsuakmi fimthiamnak pawl hi ramsungah hman thei, hman thiam ding hi a si.
Cutin cang thei dingin ram leng um pawlin mifim, mithiam pawl kan cawisan thiam, an phu tawk upatnak kan pek ih canpual \ha sangka on sak in ram le miphun hrang \uan duhnak an neih thei nak ding hrangah siseh an sunmang neih mi ram le miphun hrangah an \uansuak thei nak ding hrangah siseh kan dinpi, thazang kan pek, a \ulmi canpual \ha, sangka onsak in hmanrua pawl kan pek, kan bawmbawi thiam ding a thupi zet.
Cuvekin thiamsang filawr pawl cu an fimthiamnak pawl ram le miphun hrang hmang thiam dingin kan forhfial khal a thupi zet. Cuvek \hiam\hiam in ramsung um pawl khalin ramleng thiamsang kan neihmi pawl an duhdawt ih an hman thiam, upatnak an pek ih sangka an onsak, an sawm thiam le hman thiam ding a thupi zet a si.
Chin mi lakah ramleng ah fimthiamnak zirtu pawl a hmang thiam tutu \hansohnak lamah an tlancak ding a si.
Shekhem Mekazin 2015. Legacy interview transcribed from supplied source pages; review spelling against the original before publication.